ကယားပြည်နယ်ဝန်ကြီးချုပ် အခြေခံပညာကျောင်းသားကျောင်းသူများအတွက် နွေရာသီသင်တန်းများ ဖွင့်ပွဲအခမ်းအနား တက်ရောက်ချီးမြှင့်

မြန်မာ့ဂုဏ် မတ်လ ၁၀

ကယားပြည်နယ်အစိုးရအဖွဲ့က ကြီးမှူးကျင်းပသော အခြေခံပညာကျောင်းသားကျောင်းသူများအတွက် နွေရာသီ ယဉ်ကျေးလိမ္မာ၊ အင်္ဂလိပ်စာ၊ ပန်းချီနှင့် ကွန်ပျူတာသင်တန်းများ ဖွင့်ပွဲအခမ်းအနားကို ယနေ့နံနက်ပိုင်းတွင် လွိုင်ကော်မြို့ ပြည်နယ်ခန်းမ၌ ကျင်းပခဲ့ပါတယ်။

အခမ်းအနားသို့ ပြည်နယ်ဝန်ကြီးချုပ် ဦးစိန်ဦး၊ ဒေသကွပ်ကဲရေးမှူး၊ ပြည်နယ်တရားသူကြီးချုပ်၊ ပြည်နယ်အစိုးရအဖွဲ့ဝင်များ၊ ဌာနဆိုင်ရာတာဝန်ရှိသူများနှင့် သင်တန်းသားသင်တန်းသူများ တက်ရောက်ခဲ့ကြပါတယ်။

အခမ်းအနားတွင် ကျောင်းသားကျောင်းသူများက သီချင်းများဖြင့် ဖျော်ဖြေတင်ဆက်ခဲ့ကြပြီး ပြည်နယ်ဝန်ကြီးချုပ်က အဖွင့်အမှာစကားပြောကြားကာ နွေရာသီကာလအတွင်း ကျောင်းသားလူငယ်များ အားလပ်ချိန်ကို အကျိုးရှိစွာအသုံးချပြီး အသိပညာ၊ အတတ်ပညာများ တိုးတက်လာစေရန် ရည်ရွယ်၍ သင်တန်းများ ဖွင့်လှစ်ခြင်းဖြစ်ကြောင်း ပြောကြားခဲ့ပါတယ်။

ထို့နောက် နွေရာသီသင်တန်းများအတွက် ထောက်ပံ့ငွေများ ပေးအပ်ခဲ့ပြီး သီဆိုဖျော်ဖြေသည့် ကျောင်းသားကျောင်းသူများအား ဂုဏ်ပြုချီးမြှင့်ငွေများ ပေးအပ်ခဲ့သည်။ ယင်းသင်တန်းများကို နည်းပြ (၁၉) ဦး၊ သင်တန်းသား (၃၁၆) ဦးဖြင့် သင်တန်းကာလ (၁၈) ရက်ကြာ ဖွင့်လှစ်သွားမည်ဖြစ်ကြောင်း သိရပါတယ်။

ယင်းနေ့ မွန်းလွဲပိုင်းတွင် ကယားပြည်နယ် နိုင်ငံ့စီးပွားမြှင့်တင်ရေးရန်ပုံငွေ စီမံခန့်ခွဲမှုကော်မတီ လုပ်ငန်းညှိနှိုင်းအစည်းအဝေးကို ပြည်နယ်အစိုးရအဖွဲ့ရုံး အစည်းအဝေးခန်းမ၌ ကျင်းပခဲ့ပြီး ပြည်နယ်ဝန်ကြီးချုပ်နှင့် တာဝန်ရှိသူများ တက်ရောက်ကာ ရန်ပုံငွေထုတ်ချေးခြင်း၊ ပြန်လည်ပေးဆပ်မှုနှင့် ဒေသဖွံ့ဖြိုးရေးလုပ်ငန်းများ ထိရောက်စွာ ဆောင်ရွက်နိုင်ရေးအတွက် ဆွေးနွေးခဲ့ကြကြောင်း သိရပါတယ်။
#Myanmagon